Um helgina verður haldin spennandi leiksmiðja sem er hugsuð sem aðdragandi að uppsetningu leikfélagsins leikáriđ 2019-2020. Það skýrist vonandi um eða eftir helgi hvaða leikrit verður fyrir valinu, en eins og er höfum við verið að skoða m.a. Djöflaeyjuna! Æfingar hefjast á hefðbundnum tíma í byrjun janúar 2020 og frumsýnt verður um miðjan febrúar.
Leiksmiðjan er opin öllum áhugasömum 16 ára og eldri, hvort sem áhuginn liggur á sviði leiklistar eða á bakvið tjöldin. Að vanda tökum við sérstaklega vel á móti nýju fólki sem hefur áhuga á að bætast í hina sívaxandi leikhúsfjölskyldu eða vill einfaldlega kynna sér starf leikfélagsins betur
Að þessu sinni mun hinn margrómaði Rúnar Guðbrandsson mæta vaskur til leiks. Rúnar hefur komið áður við sögu leikfélags Selfoss því árið 2017 leikstýrði hann Kirsuberjagarðinum eftir Chekov og árið 2012 Sólarferð eftir Guðmund Steinsson. Rúnar hefur sett upp fjölda sýninga hjá sjálfstæðum atvinnuleikhúsum og áhugaleikfélögum um land allt, auk þess kennir hann við Kvikmyndaskóla Íslands.
Við hvetjum alla áhugasama til að kíkja við um helgina og taka þátt í fjörinu. Þeir sem komast ekki vegna t.d. vinnu geta haft samband við stjórn Leikfélagsins og gefið kost á sér fyrir uppsetningu leikársins, eða rekið inn nefið og sýnt aðeins framan í sig þó ekki sé nema rétt til að kasta kveðju á leikstjórann.
Leiksmiðjan verður í Litla Leikhúsinu við Sigtún á Selfossi laugardag og sunnudag (26.-27. október) frá kl. 13:00 – 18:00.
Sjáumst hress og kát
Stjórn Leikfélags Selfoss
